એક મહિલા કર્મચારીની ખાનગી ડાયરી

આજે એક વ્યંગ વાર્તા મૂકુ છું. કોઈ વાંચકે બંધબેસતી પાઘડી પહેરી લેવી નહિ. આ વાર્તા, એ ફક્ત ‘વાર્તા’ જ છે. 

એક મહિલા કર્મચારીની ખાનગી ડાયરી 

       આમ તો મને ડાયરી લખવાની ટેવ નથી. એવી મહેનત કોણ કરે ? પણ આમે ય મારે મહેનતનું બીજુ કામ જ ક્યાં છે ? અરે, સાચુ પૂછો તો મારે કશું ય કામ જ ક્યાં છે ? સરકારી કર્મચારી છું, એટલે મારે ઓફિસમાં કામ કરવાની બાબતમાં તો ખૂબ જ ‘શાંતિ’ છે, એટલે કે નવરી જ છું. તો પછી થયું કે લાવ, મારી આ સુનહરી જિંદગી વિષે મારી ડાયરીમાં નોંધ લખવાની રાખું. ભવિષ્યમાં કો’ક દિવસ વાંચીએ તો મજા પણ આવે કે વાહ ! શું સુંદર જિંદગી જીવ્યા’તા !

       ગઈ કાલની જ વાત કરું. ગઈ કાલે જાન્યુઆરીની પહેલી તારીખ હતી. આમ તો નવું વર્ષ દર વર્ષે બેસે છે. પણ આ વખતનું નવું વર્ષ કંઇક ખાસ હતું. આજે સરકાર પગારપંચનો અહેવાલ બહાર પાડવાની હતી, એટલે અમને એ જાણવાની બહુ જ ઈંતેજારી હતી. હું અને મારી બહેનપણીઓ બસમાંથી ઉતરીને રોજની જેમ ઓફિસે પહોંચ્યાં. આજે તો અમે રોજ કરતાં વહેલાં ઓફિસે આવી ગયાં હતાં. ઓફિસ ખુલવાના સમયથી ફક્ત અડધો કલાક જ મોડું થયું હતું. ઓફિસમાં પહોંચીને હાથ મોં ધોવાનું, માથાના વાળ, બિંદી, પીનો, સાડી એ બધુ સરખું કરવાનું, પાવડર લગાવવાનો, બાજુની કેન્ટીનમાં ચા પીવાની, છાપુ વાંચવાનું – આ બધું કામ હું રોજ એક કલાકમાં જ પતાવી દઉં છું. મારી ઓફિસના કામનો કિંમતી સમય વધુ બગાડતી નથી. પણ આજે તો આ બધુ કામ બાજુએ મૂકી પેલો અહેવાલ જાણવા તલપાપડ બની હતી. સરકારી કર્મચારીઓ માટે પગારપંચનો અહેવાલ આજે બહાર પડવાનો હતો. બપોરે બાર વાગે ધારાસભામાં આ અહેવાલ જાહેર થવાનો હતો. પણ અમારે એક ધારાસભ્ય સાથે ઓળખાણ હતું. તેથી સાડા અગિયાર વાગે તો અહેવાલની મુખ્ય મુખ્ય વિગતો અમારી પાસે આવી ગઈ. ધારાસભ્યનું ઓળખાણ આવે વખતે બહુ કામ આવે છે. અમે એ ધારાસભ્યની પત્ની સાથે હરવાફરવાનું, તેને કોઈક વાર ચાપાણી કરાવવાનું કે તેની બર્થડેના દિવસે તેને ફૂલગુચ્છો અને મીઠાઈપેકેટ આપવાનું અચૂક યાદ રાખીએ છીએ. આવાં અગત્યનાં કામ અમે ઓફિસસમય દરમ્યાન જ પતાવી દઈએ છીએ. એનો અર્થ એવો નથી કે અમે ઓફિસના કામને રઝળતું મૂકતા હોઈશું. ઓફીસના કામને પણ અમે આ બીજાં કામ જેટલું જ મહત્વનું સમજીએ છીએ.

       હા, તો હું શાની વાત કરતી હતી ? યાદ આવ્યું. પગારપંચની. પગારનો અહેવાલ જોયો. મારા પગારમાં લગભગ બે હજાર રૂપિયા જેટલો વધારો થશે, એવી મેં અહેવાલ પરથી ગણતરી કરી. પણ આટલા મોંઘવારીના જમાનામાં આટલા વધારાથી શું થાય ? અહેવાલ આવતા પહેલાં મેં તો કેટકેટલાં શમણાં જોયાં હતાં !…..પગાર વધશે એટલે દર મહિને એકાદ સાડી કે સારામાંનું એક ઇન્ટીમેન્ટ ખરીદશું. પેલી આરતીના જેવી સેન્ડલ ખરીદવી છે. પેલી બિંદુડી હમણાં જ ૨૦૦૦૦ રૂપિયાનો સેટ લાવી છે. સેટમાં તે કેવી સરસ લાગે છે ! ના, ના, પણ હું શું તેનાથી કમ છું ? ના, નથી જ. મારે ય એવો સેટ લેવો છે. મારા ‘એ’ બિંદુડીને દૂરથી જ જોઈને તેના રૂપનાં વખાણ કરવા બેસી ગયા હતા. મારે એમને ધમકાવીને કાબૂમાં રાખવા પડશે.

       પણ આટલો જ પગારવધારો ? ના, આમ નહિ ચાલે. કંઇક કરવું પડશે. હું, મારી બહેનપણીઓ અને બીજા કર્મચારીઓ – અમે બધાએ મીટીંગ ભરીને અહેવાલની કડક આલોચના કરી અને તેમાં સુધારા માટે આંદોલન કરવાનું નક્કી કર્યું. એટલામાં તો ઓફિસનો ટાઇમ પૂરો થવા આવ્યો. આજે ઘણું કામ કર્યું. બપોરે અડધા કલાકની રીસેશમાં પણ ઝડપથી ચાનાસ્તો કરીને કલાકમાં તો પાછી આવી ગઈ. બોસે આજે એક પત્ર ટાઈપ કરવા આપ્યો હતો, તે કામ બાકી રહી ગયું. પણ બેચાર દિવસમાં તો હું તે પતાવી દઈશ. સરકારી ઓફિસ છે. કામ તો કરવું જ જોઈએ ને ?

       સાંજે આઠ વાગે આ ડાયરી લખી રહી છું. મારા ‘એ’ છોકરાંને લઈને થોડી ખરીદી કરવા ગયા છે. આવે એટલે જમી લઈએ. આજે તો થાક લાગ્યો છે. ઉંઘ પણ આવે છે……..

Advertisements

3 ટિપ્પણીઓ (+add yours?)

  1. Preeti
    ઓક્ટોબર 16, 2011 @ 04:47:31

    આપે સરકારી કર્મચારીઓના કામ કરવાની રીત પર સરસ વ્યંગાત્મક વાર્તા મૂકી છે.

    જવાબ આપો

  2. પરાર્થે સમર્પણ
    ઓક્ટોબર 25, 2011 @ 06:02:03

    આદરણીય શ્રી

    આપને તેમજ આપના પરિવારજનોને દીપાવલીના પર્વની શુભ કામના અને નુતન વર્ષાભિનંદન.

    નવું વર્ષ આપની આશા ઉમંગોને પરિપૂર્ણ કરી અનેરી સિધ્ધિઓ અર્પી સફળતાના શિખરો સર કરાવી

    દ્રઢ મનોબળ સુખ સંપતિ અને તંદુરસ્ત આરોગ્ય બક્ષે એવી અપેક્ષા

    જવાબ આપો

  3. • » નટખટ સોહમ રાવલ « •
    ડીસેમ્બર 21, 2011 @ 04:30:55

    મજાની વાત કરી સરજી આપે… 🙂 સરકારી નોકરીનો Daily Task Report બરાબર જ છે.! 😉

    જવાબ આપો

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out / બદલો )

Twitter picture

You are commenting using your Twitter account. Log Out / બદલો )

Facebook photo

You are commenting using your Facebook account. Log Out / બદલો )

Google+ photo

You are commenting using your Google+ account. Log Out / બદલો )

Connecting to %s

%d bloggers like this: