ગૌમુખ ધોધ

                                                   ગૌમુખ ધોધ

સોનગઢથી ડાંગમાં પ્રવેશવાના રસ્તે ૧૦ કી.મી. જેટલું ગયા પછી ધોણ ગામ આવે છે, અહીંથી ડાબી બાજુ વળી ૪ કી.મી. જાવ એટલે ગૌમુખ આવે છે. અહીં ગાઢ જંગલોની વચ્ચે એક જગાએ ગાયના મુખમાંથી પાણી નીકળે છે, એટલે આ જગા ગૌમુખ કહેવાય છે. આજુબાજુ ગાઢ જંગલો છે. અહીં બેસીને જંગલો માણવાની મજા આવે છે. આ જગાનું મુખ્ય આકર્ષણ તો એક ધોધ છે. ગૌમુખથી વૃક્ષોની ઘટાઓમાં પસાર થઈને ૧૨૫ પગથિયાં નીચે ઉતરતાં ધોધ આગળ પહોંચાય છે. ધોધનું પાણી પત્થર પર પડીને આગળ વહી જાય છે, આથી પત્થર પર બેસીને કે ઉભા રહીને નહાવાનું બહુ જ સરળ છે. ધોધનું પાણી એટલા જોરથી વરસે છે કે બરડા પર કોઈ ડંડા મારતું હોય એવો અનુભવ થાય છે ! ધોધનું પાણી આગળ વહી, ફરીથી ધોધરૂપે પડે છે. બાજુમાં ભગવાનની એક નાની દેરી છે. જંગલની વચ્ચે આ બધું કેટલું સરસ લાગે ! ઉપર ગૌમુખ આગળ બેચાર દુકાનો છે. અહીં ચા-નાસ્તો મળી રહે છે. ફરવા જવા માટે એક સુંદર જગા.

 

માયાદેવી મંદિર અને ધોધ

ગુજરાતનો ડાંગ જીલ્લો કુદરતી સૌન્દર્યથી ભરપુર છે. અહીં ગીરા, ગીરામલ, ક્રેબ, ચીમેર જેવા કેટલા યે નાનામોટા ધોધ છે, પૂર્ણા, અંબિકા જેવી ખડખડ વહેતી નદીઓ છે, જંગલો, ટેકરીઓ, ઉંચાનીચા રસ્તા, ઝરણાં, કુદરતને ખોળે વસતા લોકો – એમ ઘણું બધું છે. સર્વત્ર પથરાયેલી હરિયાળી અને વાદળોથી વીંટળાયેલી ટેકરીઓ જોવાનો લ્હાવો અદભૂત છે. ચોમાસામાં કુદરતી સૌન્દર્યનો નઝારો માણવો હોય તો ડાંગ પહોંચી જવું જોઈએ.અહીં મારા આ બ્લોગમાં ડાંગનાં જોવાલાયક સ્થળોનું એક પછી એક વર્ણન કરવાની ઈચ્છા છે. આજે માયાદેવી મંદિર અને ધોધથી શરૂઆત કરીએ.                    

                                    માયાદેવી મંદિર અને ધોધ

ડાંગમાં પેઠા પછી સૌથી પહેલો ધોધ માયાદેવીના મંદિર આગળ આવે છે. માયાદેવી જવા માટે સૌથી પહેલાં વ્યારા જવાનું. ભરૂચથી અંકલેશ્વર, વાલિયા, ઝંખવાવ અને માંડવી થઈને વ્યારાનું અંતર 110 કી.મી. છે. વ્યારા મોટું નગર છે. વ્યારાથી ભેંસકાતરી ગામ જવાનું. ગામ કંઇ મોટું નથી. ઝૂંપડા જેવાં માત્ર દસ બાર ઘરો જ છે. અહીં ખડખડ વહેતી પૂર્ણા નદી જોવા જેવી છે. વ્યારાથી ભેંસકાતરીનું અંતર 25 કી.મી. છે. ભેંસકાતરીથી માયાદેવી માત્ર ત્રણેક કી.મી. ના અંતરે છે. પ્રવેશ આગળ, ‘સુસ્વાગતમ, માયાદેવી મંદિર’ નું કલરફૂલ બોર્ડ મારેલું છે. બોર્ડથી એક કી.મી. ગયા પછી, રામેશ્વર મહાદેવ નામનું શીવમંદિર આવે છે. બાજુમાં હનુમાન મંદિર છે. મંદિર આગળ બગીચો છે. બાળકોને રમવા માટે હીંચકા, લપસણી વગેરે છે. એક દુકાન છે, ત્યાં ચા-નાસ્તો મળે છે. બહુ જ સરસ જગા છે. અહીં બીજી કોઈ વસ્તી નથી. મંદિર આગળ બેઘડી આરામ ફરમાવવાનું મન થઇ જાય એવું છે. માયાદેવીની ઉત્પત્તિ કેવી રીતે થઇ તેનો ઈતિહાસ દર્શાવતું અહીં બોર્ડ મારેલું છે.

અહીં ખાસ જોવા જેવી વસ્તુ તો મંદિરની પાછળ પૂર્ણા નદી, તેના પર બાંધેલો ચેકડેમ અને ધોધરૂપે ખીણમાં પડતું પાણી છે. મંદિરમાં દર્શન કરીને પાછળ જાવ એટલે આ નજારો નજરે પડે છે. વાહ ! શું સરસ દ્રશ્ય છે ! અહીં ચેકડેમ પરથી છલકાઈને ખડકો પર પડતું પાણી જે પ્રવાહ પેદા કરે છે, તે જોવા જેવો છે. ધસમસતું આ પાણી ખીણમાં ધોધરૂપે પડીને આગળ વહે છે. એ જબલપુર પાસેના ધુંઆધાર ધોધની યાદ અપાવી જાય છે. ચેકડેમ ઉપર ભરાયેલું સરોવર પણ ભવ્ય લાગે છે. થોડાં પગથિયાં ઉતરી ખીણ આગળ જવાય છે. ખીણની એક ધારે ભગવા કલરની એક નાની દેરી છે. બોર્ડમાં લખેલા ઈતિહાસ મૂજબ, હિમાલયની પુત્રી દેવી, રાક્ષસ પાછળ પડતાં, અહીં પૂર્ણાની ખીણમાં સંતાઈ ગઈ હતી. માબાપે તેને શોધીને શીવજી સાથે પરણાવી અને રાક્ષસને માયા છોડવા જણાવ્યું. આથી આ સ્થળ માયાદેવી કહેવાય છે.

ખીણની આજુબાજુ ખડકો પર થઈને ચેકડેમની સાવ નજીક જવાય છે. મંદિરની પાછળ એક ઢાળ ઉતરીને પણ ચેકડેમની નજીક જવાય છે. ચેકડેમ બિલકુલ નજીકથી જોતાં ખૂબ જ ભવ્ય લાગે છે.  ખડકો પર અથડાતા અફળાતા પાણીનો જોરદાર અવાજ અને ખીણમાં ધોધરૂપે પડતા પાણીનું દ્રશ્ય અદભૂત છે. પાણીની નજીક જવાય પણ તેમાં પગ બોળાય કે ઉતરાય એવું નથી. જો ઉતરો તો ગયા જ સમજો. પાણીનો સખત પ્રવાહ અને ખીણમાં પડતું પાણી – તમને કોઈ જ બચાવવા ના આવી શકે. અહીં ખડકો પર બેસો, ફરો, ફોટા પાડો, બસ મજા કરો.

આ ધોધ જરૂર જોવા જેવો છે. વરસાદની ઋતુમાં અને પછી પણ નવેમ્બર સુધી ધોધમાં પાણી હોય છે. પછી  ચેકડેમમાં પાણી ઓછું થઇ જાય કે ના હોય ત્યારે ધોધ જોવાની મજા ના આવે. મંદિર આગળની દુકાનમાં નાસ્તો મળે છે. ત્યાં બેઘડી બેસીને આરામ કરાય એવું છે. ક્યારે જાઓ છો માયાદેવી? ત્યાં જાવ, મનમાં એક સરસ સ્થળ જોયાનો આનંદ થશે.

 

 

બેંગ્લોર પેલેસ

                                 બેંગ્લોર પેલેસ

બેંગ્લોરનો પ્રખ્યાત મહેલ માયસોરના વડીયાર રાજાની માલિકીનો છે. આ એક સરસ જોવાલાયક સ્થળ છે. મહેલનો દેખાવ અને આગળના ભવ્ય બગીચા જોઇને ટુરિસ્ટો ખુશ થઇ જાય છે. અહીં મુલાકાતીઓને, રાજાના તે જમાનાના રથ પર સવારી કરાવીને બગીચામાં ફેરવે છે, તમે જાણે કે થોડી ક્ષણોના રાજા હો એવો અનુભવ થાય છે, બહુ જ રોમાંચક ! આ રથને ઘોડા જોડેલા હોય છે. દક્ષિણની ઘણી ફિલ્મોનાં શુટીંગ અહીં થયેલાં છે.

કહે છે કે માયસોરના મહારાજા ચામરાજેન્દ્ર વડીયાર ઇંગ્લેન્ડ ગયા, ત્યારે ત્યાંના વિન્ડસર કિલ્લાને જોઈ ખુશ થઇ ગયા, અને તેમને બેંગલોરમાં એવો મહેલ બાંધવાની પ્રેરણા મળી. આ મહેલ જે. ગેરેટ નામના એક અંગ્રેજ શિક્ષકે ૪૨૦૦ ચો.મી. (૪૫૦૦૦ ચો. ફીટ) જમીન પર બાંધ્યો હતો. બેંગ્લોરની સેન્ટ્રલ હાઈ સ્કુલના તે પહેલા પ્રીન્સીપાલ હતા. અત્યારે ત્યાં સેન્ટ્રલ કોલેજ છે. મહેલનું બાંધકામ ૧૮૬૨માં શરુ થયું હતું, અને ૧૯૪૪માં પૂરું થયું હતું. ૧૮૭૩માં આ મહેલ ચામરાજેન્દ્ર વડીયારે ૪૦,૦૦૦ રૂપિયામાં ગેરેટ પાસેથી ખરીદી લીધો, અને પછી તેને સુધાર્યો. અત્યારે તે મૈસુરના રાજવી કુટુંબના શ્રીકાંતદત્ત નરસિંહરાજ વડીયારની માલિકીનો છે. તેમણે મહેલ ૨૦૦૫માં પબ્લીક માટે ખુલ્લો મૂક્યો. ફીની આવકમાંથી મહેલની સાચવણીનો ખર્ચ નીકળે છે.

મહેલમાં બેડરૂમો સહીત કુલ ૩૫ રૂમો છે. ગ્રાઉન્ડ ફ્લોર પર મોટી ખુલ્લી પરસાળ છે, તેની ફરસ બ્લ્યુ રંગના ટાઈલ્સની છે. ચિત્રો (Paintings) મઢેલી સીડી પર ચડીને પહેલા માળે દરબાર ગઢમાં જવાય છે. રાજા એમાં દરબાર ભરતા. હોલને ગોથીક સ્ટાઈલની કાચવાળી બારીઓ છે. પડદાવાળો અમુક વિસ્તાર સ્ત્રીઓને દરબારની વિધિ નિહાળવા માટે અલાયદો છે. મહેલના બોલરૂમમાં રાજા પાર્ટીઓ ગોઠવતા.

મહેલમાં હાથથી ચલાવાતી લિફ્ટ અને લાકડાના પંખા છે. દિવાલો અને સોફા પર પીળા રંગનું પ્રભુત્વ છે. દિવાલો પરનાં ચિત્રોમાં અમુક ડચ અને ગ્રીક પ્રકારનાં છે. રાજા રવિ વર્માનાં ચિત્રો પણ અહીં છે. મહેલમાં વપરાયેલા ઘણા કાચ અને અરીસા ઈંગ્લેંડથી લાવેલા છે. મહેલની અંદર લાકડા પર કોતરકામવાળાં સુશોભનો છે. ભોંયતળિયુ પણ સુશોભિત છે, છત પર પેઈન્ટીંગ્સ છે અને વિક્ટોરીયા સ્ટાઈલનું ફર્નીચર છે.

વડીયાર રાજાઓ શિકારના શોખીન હતા. કહે છે કે જયચામરાજ વડીયારે ૩૦૦ વાઘ અને ઘણાબધા હાથીનો શિકાર કરેલો. આવા એક હાથીનું માથું મહેલના પ્રવેશ આગળ રાખેલું છે. હાથીના પગનું બનાવેલું સ્ટુલ, દંતુશૂળમાંથી બનાવેલ ફૂલદાની અને મેળવેલી ટ્રોફીઓ મહેલમાં પ્રદર્શિત કરેલી છે.

છેલ્લાં કેટલાંક વર્ષોથી સાંસ્કૃતિક કાર્યક્રમો અને સામાજિક પ્રસંગો જેવા કે લગ્ન, પ્રદર્શન, સંગીત સમારોહ, રમતો વગેરે મહેલના ગ્રાઉન્ડ પર યોજાય છે. લંડનના આયર્ન મેઈડન બેન્ડે ૨૦૦૭માં અહીં યોજેલી મ્યુઝીક કોન્સર્ટ ભારતમાં યોજાયેલ સૌથી મોટી કોન્સર્ટ હતી, દેશવિદેશથી ૩૮૦૦૦ પ્રેક્ષકો જોવા સાંભળવા આવ્યા હતા. મહેલના સંકુલમાં એમ્યુઝમેન્ટ પાર્ક છે, તે ફન વર્લ્ડના હુલામણા નામે જાણીતો છે.

૧૯૯૫માં રીલીઝ થયેલી હિન્દી ફિલ્મ ગેમ્બલર માટે કુમાર સાનૂ અને સાધના સરગમે ગાયેલા અને શિલ્પા શેટ્ટી તથા ગોવિંદા પર ફિલ્માવાયેલા ગીત ‘હમ ઉનસે મહોબત કરકે’નું શુટીંગ આ મહેલ આગળ થયેલું. ૨૦૧૨ની રાઉડી રાઠોડ ફિલ્મના ગીત ‘ધડંગ ધાંગ’માં પણ આ મહેલ સહેજ વાર માટે દેખા દે છે.

આ મહેલ, બેંગ્લોરમાં વસંતનગરમાં પેલેસ રોડ પર, માઉન્ટ કાર્મલ ઇન્સ્ટીટયુટ ઓફ મેનેજમેન્ટ અને  સદાશીવનગરની નજીક આવેલો છે. મહેલ જોવાનો સમય સવારના ૧૦થી સાંજના ૫ – ૩૦ સુધીનો છે. રવિવારે બંધ હોય છે. એન્ટ્રી ફી ૨૧૦ રૂપિયા, મોબાઈલ રાખવાના ૧૦૦ રૂપિયા અને કેમેરો રાખવાના ૬૭૫ રૂપિયા છે. પેલેસની ટુર એક કલાકની ઓડિયો ટુર છે, જે સાત ભાષામાં છે. એમાંની એક ભાષા હિન્દી છે. સંપર્ક માટેના ફોન નંબર 080 8023315789 and 080 23360818 તથા વેબસાઈટ karnatakatourism.org છે.

અત્યારે શ્રીકાંતદત્ત વડીયારની દેખરેખ હેઠળ મોટું રીનોવેશન ચાલી રહ્યું છે. અહીં ૧૦૦૦ જેટલા ફોટોગ્રાફ્સ, રાજાના પોષાકો અને સીલ્કનાં કપડાં પ્રદર્શનમાં મૂકાશે. પબ્લીક તે ખરીદી પણ શકશે. બોલરૂમ, પાર્ટીઓ માટે ભાડે અપાશે. મહેલ પર રોશની લગાડવાનું પણ ચાલી રહ્યું છે.

 

શરીરનાં અંગોનાં નામ

                               શરીરનાં અંગોનાં નામ

શરીરનાં મોટા ભાગનાં અંગોનાં નામ બે અક્ષરવાળાં છે, એ તમે માર્ક કર્યું છે? નીચેનું લીસ્ટ જુઓ.

આંખો

કાન

નાક

ગાલ

કીકી

ડોળો

બુટ (કાનની)

માથું

વાળ

ટાલ

જીભ

દાંત

દાઢ

હોઠ

દાઢી

મૂંછ

ડોક

બોચી

ગળું

ખભો

હાથ

કોણી

કાંડું

વેઢા

નખ

રેખા (હાથમાંની)

છાતી

પેટ

ડુંટી (નાભિ)

કેડ

પીઠ

વાંસો

પગ

એડી

ઘૂંટી

પાની

પંજો

 

ત્રણ અક્ષરવાળાં અંગો

કપાળ

ભ્રમર

પાંપણ

ગલોફાં

ચીબૂક

હથેળી

આંગળી

અંગૂઠો

બગલ

ઘૂંટણ

ચામડી

કરોડ

હાડકું

પાંસળી